তোমাৰ হাঁহিৰ কাৰণ
তোমাৰ হাঁহিৰ কাৰণ যদি মই হওঁ
এদিন এৰি গুছি গলে
তুমি জানো কান্দিব পাৰিবা ?
এয়া আপোনাৰ কেনে প্ৰশ্ন ?
না হাহিবলৈ কিবা কাৰণ লাগে,
না কান্দিবলৈ ?
না আপোনাক ভালপাবলৈ কিবা কাৰণ লাগে,
না আপোনাক হেৰুৱাবলৈ ?
সেয়া নাজানো…
কেৱল এটাই কথা জানোঁ,
আপোনাকে হিয়া উজাৰি ভাল পাব,
নিজতকৈয়ো বেছি হয়তো !
************
ভালপোৱা
তুমি অহাৰ বাটত যে
সোণাৰু ফুলিল
কাঞ্চন ফুলৰ সুবাসত যে
নিয়ৰৰ কণিকা সৰিল
ভাললগা আলিবাটত
ফুলি উঠা অভিমানবোৰ যে
ভালপোৱা হৈয়ে সৰকি পৰিল
মোৰ হৃদয়ৰ গোপন কোণত…
************
বিষাদৰ কবিতা কেনেকৈ ৰচিম
কবিতাৰ বুকুত আজি
শব্দৰে বিষাদ ঢালিম,
লুকুৱাই ৰাখি থোৱা যন্ত্ৰণাবোৰৰ পৰা
মুক্তি বিচাৰিম ।
কিন্তু কেনেকৈ ৰচিম নতুন কবিতা ?
বুকুৰ মাজত শিল এটুকুৰা ঘূৰাই ফুৰাটো
জানো সহজ কথা ?
************
ৰ'দ
এচেৰেঙা ৰ'দ আহি যে চুই যায়
আন্ধাৰৰ আৰে আৰে পোহৰ বিলায়
কেতিয়াবা জানো ভাবি চাইছোঁ প্ৰকৃতিৰ ?
নাচোনত লাগি অহা প্ৰহেলিকাবোৰৰ কাহিনী
বিচাৰি ফুৰিছোনে !
ইয়াৰ সান্নিধ্যৰ পৰিধি কি?
নিজক জানোঁ সুধি চাইছোঁ কেতিয়াবা
ভালে আছোঁ নে বুলি?
পাইছোনে বিচাৰি ফুৰা ৰ'দ জাকৰ ঠিকনা !
প্ৰশ্ন কৰিবলৈ মন যায় কেতিয়াবা নিজকে ??
************
মোলৈ আপোনাৰ কিমান মৰম
কথা দিছোঁ,
হৃদয়ৰ সভ্ৰান্ত বাসনাৰে লালন কৰিম
আপোনাৰ প্ৰতিটো চৰ্ত
মূল্য মইয়ো দিম আপোনাৰ প্ৰেৰণাক
কিন্তু কব লাগিব আপুনি
মোলৈ আপোনাৰ কিমান মৰম ?
************
প্ৰশ্ন হয় কেতিয়াবা
মাজনিশা আকাশলৈ চাইছানে কেতিয়াবা ?
চাবাচোন,
মোক নহলেও কাৰোবালৈ খুব মনত পৰিব ।
শীতৰ ৰাতিপুৱা নিয়ৰ তিতা দুৱৰিত খোজ
দিছানে কেতিয়াবা ?
দিবাচোন,
মোক নহলেও কাৰোবাক হিয়া উজাৰি
মৰম কৰিবলৈ মন যাব ।
ফুলি থকা গোলাপৰ পাহি এটি স্পৰ্শ
কৰিছানে কেতিয়াবা ?
কৰিবাচোন,
মোলৈ নহলেও আপোনাৰ প্ৰেয়সীক
নিশ্চয় কাষত পাবৰ মন যাব ।
No comments:
Post a Comment